Friday, May 22, 2009

BANSDA KO GARVA HAI APNE LAADLE PAR...



Suraj Vyas/Tulsidas Vaishnav
Surat, 20th May 2009, Rajasthan Patrika

'Ey mere dil kahi aur chal'... is sadabahar geet ki dhun banane se barso pahle lagbhag isi tarz par chhota sa gaon chhodkar Jaykishen jab mayanagri Bombay ki or nikle they, to unhe pata nahi tha ki yah yatra ek din unhe mahaan sangeetkar bana degi. 150 se adhik filmo ke saat so se adhik geeto mein jaan phoonke wali mashoor jodi SHANKAR JAIKISHEN mein se Padmashree Jaikishen ki yah kahani hai.

Navsaari zile ke Bansda state mein 4th November 1929 ko Ambaben aur Dahyabhai Panchal ke ghar janme Jaikishen ke pita behad gareeb they. Chhah ladkiyon aur teen ladko wale unke parivaar ke is chhote bete ne mata-pita ko kabhi kisi zaroorat ke liye tang nahi kiya. Ek jodi kapdo par guzara kar lene wale Jaikishen ko sangeet ke alawa aur kisi bhi cheez se lagav nahi tha. Pyar se sab inhe BATU kahte they. Khoobsoorat vyaktitva ke maalik Jaikishen shuru se hi kisi filmi hero ki tarah lagte they. Bansda state ke tatkaalin maharaja INDRA SINGH SOLANKI bhi sangeet ke shaukeen they. Unhone SHRI PRATAP SILVER JUBILEE SANGEET SHALA ki sthapna ki thi. Yaha Bansda (Vansda) ke bachcho ko sangeet ki seeksha nishulk di jaati thi. Jaikishen ne sangeet ka prathmik gyaan yahi se liya. WADILAAL aur PREMSHANKAR unke prarambhik guru rahe. Bade bhai BALWANT bhi sangeet ka bada gyan rakhte they aur bhajan gakar guzara karte they. Jaikishen ki alpayu mein hi pita ka saya sir se uth gaya aur lakdi ki vastuyein banane ke parivarik karya mein unhe lagna pada.

SANGEET SARVOPARI : Sangeet shala mein Jaikishen ke sahpathi rahe KESHAV PREMJI DHAMIR aaj bhi bachchon ko sangeet sikhlate hain. Keshav Dhamir ke anusaar behad gareeb parivar ke hone ke bavajood Jaikishen chhoti umra mein hi pet se zyada samay sangeet ko dete they. Dono hathon se harmonium bajane mein unhe bachpan se hi maharat haasil tha.

BOLLYWOOD KA JUNOON : Jaikishen paristhitivash lage to huwe they lakdi ke peshe mein magar sangeet ka junoon unhe Bollywood ki or kheech raha tha. Antatah: 13-14 saal ki umra mein Jaikishen Bombay aa gaye. Unke kareebi mitra ANOOP SINGH SOLANKI ke anusar sthaniy saraf GOKULDAS PREMCHAND GANDHI ne iske liye aarthik sahayta di.

PRITHVI THEATRE MEIN HARMONIUM WADAN : Bombay mein Jaikishen ne Prithvi Theatre mein maasik 75 rupiye vetan par harmonium wadak ki naukri pa li. Yaha PRITHVI RAJ KAPOOR, RAJ KAPOOR jaise mahaan kalakaro ki sohbat mili jo inki tarakki ka marg prashast karta chala gaya.


JAIKISHEN KO MILE SHANKAR : Shahar-shahar naatak ke liye ghoomte ghoomte unki mulakat SHANKAR se hui. Phir shuru huwa sangeet ki is jodi ka anokha safar. Pita ke saath theatre karte Raj Kapoor ne SHANKAR JAIKISHEN ki pratibhaon ko pahchana. Bangalore mein ek drama ke liye unhe dhun banate suna aur prabhavit hokar BARSAAT film mein sangeet dene ka offer rakha. Anubhav ke abhaav mein dono dar gaye aur mana kar diya. Par Raj Kapoor nahi maane aur kaha... "aap kar sakte ho, aapko karna hain". Isi dauraan Raj Kapoor ki film AAG mein Jaikishen ne sangeetkar RAM GANGULI ke sahayak ke roop mein bhi karya kiya.


BARSAAT SE HIT SHURUAT : Barsaat film se zabardast hit shuruat karne wali is jodi he phir pichhe mudkar nahi dekha aur ek ek kar kul 174 filmon mein sangeet diya. Barsaat ki dhun ke saath bada hi dilchasp kissa juda hain. Drama ke liye Prithvi Theatre ki team kahi gai thi. Yakayak zordar baarish mein saare kalakar stage ke niche chhip gaye tab Jaikishen teen ka dibba bajane lage. Jo dhun wo baja rahe they, Raj Kapoor ko itni pasand aai ki isi dhun par 'BARSAAT MEIN HAMSE MILE TUM' dhala gaya aur geet yaadgaar ban gaya.

YAADGAAR DHUN AUR SAMMAN :
Iske baad is jodi ne kabhi pichhe mudkar nahi dekha. Hawa mein udta jaaye, Mujhe kisi se pyar ho gaya, Aaja sanam madhur chandni mein, Sab kuchh seekha hamne, Tera jaana dil ke armaano ka, Ajeeb daasta hain ye, Mera joota hai Japani, Baharon phool barsao.. aise sainkdo geet unki dhuno ke kaaran zabardast hit rahe.

FILMFARE AWARDS : Shankar Jaikishen ko 1956 mein Chori Chori, 1959 mein Anadi, 1960 mein Dil Apna Aur Preet Parai, 1962 mein Professor, 1966 mein Suraj, 1968 mein Brahmachari, 1970 mein Pehchan aur 1971 mein Mera Naam Joker ke liye shrestha sangeetkar (best music director) ka FILMFARE samman diya gaya. 1968 mein Bharat Sarkar ne sangeet mein aham yogdan ke liye unhe PADMASHREE se sammanit kiya.

TAGDA ATMAVISHWAS : Kai baar nirmata, nayak/nayika ya vitrak ko geet pasand nahi aaye to Jaikishen ne geet ke hit hone ke baad hi mehnatana dene ki baat kahi aur amooman aise sabhi geet hit ho gaye... jaise Daag ka 'Ey mere dil kahi aur chal', Shikaar ka 'Parde mein rahne do' etc.
BAHUMUKHI WA PRAYOGDHARMI : Jaikishen kai baar mukhde bhi khud banakar dhun rach lete aur phir geetkar se poora geet karwate they. 'Main kahi kavi na ban jau', ya phir Ahmedabad ki galiyo mein ghoomte huwe Jharokhe ko dekhkar Brahmachari ke liye banaya 'Dil ke jharoke mein tujhko bithakar'... aise hi geet hain. Shri 420 mein 'Dil ka haal sune dilwala', geet mein CHU.CHU.CHU. ka prayog tha unhone apni hi awaaz mein kiya tha. Raag Bhairavi ke deewane Jaikishen ne apni beti ka naam bhi BHAIRAVI JAIKISHEN hi rakha.

PREM VIVAAH : Jaikishen ne 1963 mein Bombay ki PALLAVI MARIWALA ke saath vivaah kiya. Pallavi ke parijano ke virodh hone ke kaaran unke pita ke roop mein SHANKAR aur bhai ke roop mein RAJ KAPOOR ne kanyadaan kiya.

BANSDA KO NAHI BHOOLE : Jaikishen apne Bansda ko kabhi nahi bhoole. Unke mitra KESHAV DHIMAR jab Bombay aaye to samay nahi hone ke bawajood unhe ghar bulaya, pyar se bithaya, lassi pilai, kaafi baatein ki aur Bombay aane par hamesha ghar aane ka nyauta diya. AWAARA ke mahurat ke liye Raj Kapoor ko lekar 1953 mein Bansda aaye. 1967 mein Bansda aakar apne bachpan ki sangeet shala mein gaye aur shala ke kosh mein daan kiya.

KAM UMRA MEIN ALVIDA : 12 September 1971 mein mahaz 42 saal ki umra mein Jaikishen ne duniya ko alvida kah diya. Unki maut ke baad BANSDA sthit sangeet shala ko SHRI JAIKISHEN NIKETAN ka naam diya gaya. Doosri aur maano prashashan maano unki yaad ko mitane ke liye drid sankalpit hai. Sangeet shala ko tod diya gaya, ab waha shopping complex banega. Prathamik vidyalay ko bhi tod diya gaya hai. Par Bansda ke logo ne Jaikishen ki yaado ko unke geeto ke zariye aaj bhi apne dilo mein zinda rakha hai. Yaha ke bachche Jaikishen ke geet gaate hain. Har saal Jaikishen ke geeto ki spardha hoti hai aur achchha karne wale bachcho ko puruskrut kiya jaata hai.

Suraj Vyas (09904048389)

Author Suraj Vyas is seen here with Anandjibhai at the unveiling of Jaiishan's statue in Bansda (Vansda) in Navsari District in South Gujarat, near Bulsar / Valsad, near Dang district / Saputara.